Lekker lees!!

Francois du Toit het onlangs 'n preek gegee in 'n gemeente in Stellenboch. Dis bietjie lank maar so blessing. Ek het to besluit om stukkies daarvan met julle te deel. (As jy die hele preek soek, laat weet my dan stuur ek dit)

Enjoy!!

Dit is so wonderlik om te weet dat ons Skepper definisie kom gee het aan elkeen van ons lewens. Hy is nie verward oor jou identiteit nie en God laat Hom nie beïnvloed deur jou rugby of politiese belange nie. Hy het ’n oorspronklike getuienis en oortuiging aangaande jou en die uitsluitlike missie van Jesus Christus om uitdrukking te kom gee van God se oorspronklik bloudrukoortuiging van Sy wese, Sy onsigbare beeld en Sy gelykenis in ’n mens. God het nie in die mens ’n minderwaardige ruimte geskep waarbinne Hy nou so half opgeskeep sal moet wees met ons tyd in die vlees nie. Soos ’n voet in ’n te klein skoentjie nie. Nee, God het die spesifieke ruimte vir Sy eie wese kom skep.

Toe ons nou daar in Pretoria was het die lamppale vol plakkate gehang. As jy so in die verkeer ry lees mens dit oor en oor. Kyk, jy kan jouself in ’n depressie ry oppad werk toe. Ek besef daardie lamppaal is nooit gemaak vir daardie poster nie. Hy is gemaak vir die lig, maar ons mis die lig en ons kyk na die posters met die verkeerde nuus. God is nie op Sy senuwees en Hy kou nie naels oor wat in die politiek aangaan nie. God het ’n getuienis oor die mensdom wat Hy geanker het aan die gehoorsaamheid van een mens. Die moeilikheid wat die wêreld in die oë moet kyk is die resultaat van die ongehoorsaamheid van een mens. Hier kom Paulus en hy sien ’n ding raak en Hy skryf in Rom. 5: 18 Daarom dan, net soos dit deur een misdaad vir alle mense tot veroordeling gekom het, so ook is dit deur een daad van geregtigheid vir alle mense tot regverdigmaking van die lewe.

Kol. 2:13 En julle, wat dood was deur die misdade en die onbesnedenheid van julle vlees, het Hy saam met Hom lewend gemaak deurdat Hy julle al die misdade vergeef het, Die drie woordjies: “…saam met Hom…” is die mees kern drie woordjies in die hele Bybel. Iets het saam met Christus Jesus gebeur. Die mens is ingesluit met dit wat met Jesus Christus gebeur het. As dit nie waar was nie, dan het ons net ’n verwysing na ’n pragtige stuk geskiedenis en ’n heldedaad van tweeduisend jaar gelede. Iets het egter saam met Hom gebeur. Jesus het nie as individu gesterf nie en Hy het nie as individu lewend geword uit die graf nie. God het die mens lewend gemaak saam met Hom. Paulus sê dit in soveel woorde in Ef. 2:5 ook toe ons dood was deur die misdade, lewend gemaak saam met Christus—uit genade is julle gered—

Deut. 32:18

Die Steenrots wat jou verwek het, het jy veronagsaam; en jy het die God vergeet wat jou voortgebring het.

Ons het ons verbintenis met ons oorsprong verloor, sodat ons verbintenis met ons natuurlike geboorte, ons vlees, ons enigste verwysing en groepering geword het. Nou voel ons veilig in hierdie groepering, want dit is ons identiteit. Nou kom Jesus en Hy kom kanselleer elke distansie wat daar ooit kan wees tussen mens en mens en mens en God. In een daad kom kanselleer Hy elke definisie van distansie. Geografies, kultureel, etnies, taal en tyd. Distansie is gekanselleer.

Jes. 40 sê elke hoë berg plat en elke vallei opgevul en elke krom draai reguit gemaak. Elke vraagteken is ’n uitroepteken en al die growwe plekke is plat. God kom doen in een daad wat die mens oor die res van sy bestaan nooit self sou kon regkry nie, want Hy het van die verkeerde boom geëet. Onthou, die mens se krisis het in die tuin begin toe hy van die “do it yourself tree” geëet het. “DIY”. Terwyl die mens in sy godsdiens nog so bietjie van daardie boom pluk bly hy onder presies dieselfde slawerny. Klein bietjie wet, maar dieselfde krag. Hier kom ontdek die mens die boom van die lewe. Die verwysing van God se bloudruk, God se oorspronklike opinie wat Hy oor my uitgespreek het.

Jy sien, toe die vyand vir die eerste keer daar in die tuin met die beeld van God en vlees te doen het, toe skrik hy sy as af, want hy het die beeld van God herken. Vir tydperke was hy juis die voorste aanbidder van hierdie beeld van God en hier kom verskyn die beeld van God nie in ’n opgegradeerde engellyf nie, maar in ’n menselyf. Onmiddellik word die mens die grootste bedreiging en wat doen die vyand? Presies dit wat hyself probeer het. Sy resep kom verkoop hy aan Eva. “The do it yourself tree.” Eet van hierdie boom van kennis van goed en kwaad. Die DIY boom. Dan kan jy jou mos nou self onderskei. Dan het jy mos nou ’n maatstaf waarmee jy jouself kan meet en jy jouself soos God maak. Dit is wat die vyand so graag self wou doen. Hoekom moet ons vir God krediet gee dat Hy daarin geslaag het om Sy beeld in my te maak. Skielik eet die mens van die verkeerde boom en die heerlikheid van God sterf in hom. Die kennis van God se heerlikheid en beeld sterf in hom. Nou kom Jesus en Hy sê: “Simon, ek sê jy is rots,” want die mens het die rots vergeet wat hom verwek het. Sy oorspronklike Genesis het hy verruil vir ’n leuen vader. Hierdie leuen verwysing word nou my identiteit en my verwysing word gestaaf deurdat daar baie van ons is wat in die woestyn ronddwaal. Dan sê Jesus vir Simon: “Vlees en bloed het dit nie aan jou geopenbaar nie. Ek sê jy is rots en op hierdie rots sal ek my “ekklesia” bou en die poorte van hades sal nie stand hou teen my “ekklesia” nie.”

Dit is wat die woordjie bekering beteken. “Metanoesh” Kom dink weer saam met God. God se gedagtes word weer die inspirasie van my gedagtes. Ek dink nou weer vanuit wat God gedink en gedroom het oor my en Hy het Sy droom kom realiseer in Jesus Christus en nou maak dit soveel sin om te ontdek dat Jesus nie gekom het as ’n voorbeeld vir my nie, maar van my. As Jesus bloot gekom het as ’n voorbeeld vir my, dan sou Hy onmiddellik moes kompeteer met al die ander voorbeelde in die godsdienswêreld. Dan moet ek maar kies tussen Jesus en Boedha en die res. Toe kom Jesus egter en Hy kom openbaar aan my iets wat my herinner aan my oorspronklike ontwerp.

Wat so dinamies is van Jesus se bediening is juis sy volgelinge. Sy groottse volgelinge was die ouens wat die grootste “labels” gedra het in die samelewing. Daardie twee groot sondaaretikette. Die prostitute en die tollenaars word Jesus se grootste volgelinge. Die ouens wat die mees erkende sondaars is in die samelewing. Wat is dit in Jesus se lewe wat hulle so trek? Hulle erken hulle oorspronklike ontwerp. Hulle besef dat iemand vir hulle gelieg het. Die lewe wat voorheen my identiteit was, was ’n leuen. Hulle het die waarheid ontdek, want Jesus sê: “As julle in my woord bly sal julle die waarheid kry.” Jesus het nie ’n Bybel onder Sy arm gedra nie, maar Hy was die vervulling van die Skrifte.

Die lelike eendjie hoef nie nog ’n kursus te gaan doen oor hoe om ’n swaan mettertyd te word nie en hoe

lank dit gaan vat voor ek kwalifiseer om in die swaanhemel toegelaat te word nie. Hy moet net die waarheid ontdek dat hy ’n leuenkop gehad het oor homself. Israel se probleem: As dit nie Faro was nie, wie en wat was Israel se probleem? Die verkeerde boodskap wat hulle geglo het oor hulleself. Hulle is maar net sprinkane en dan het hulle gevoel hulle is vreeslik nederig om dit te sê. “Ek is maar net ’n arme mens, ek ellendige mens.” Toe Paulus dit uitroep in Rom. 7, toe bring Paulus die hele krisis van die wettiese godsdiensmens tot ’n punt. Hy sê dat die beste wat hy wil onder die wet, dié kan hy nie. “Ek ellendige mens, wie sal my verlos van die liggaam van hierdie dood.” Aan die einde van die dag word hierdie liggaam my grootste vyand en word ek kruisgevange gehou in my eie lyf. Hy sê: “Ek dank God deur Jesus Christus,” want God het in Jesus Christus ’n verlossingsopenbaring kom gee, sodat ons in daardie verlossingsopenbaring nie net onsself ontdek nie

2 Kor. 5:16

Ons ken dus van nou af niemand meer na die vlees nie; en al het ons ook Christus na die vlees geken, nou ken ons Hom tóg nie meer so nie.

“Soos in ’n spieël word ons verander na dieselfde beeld.” Sò, God se beeld het nie verlore gegaan in Adam se val nie. God het Sy beeld weer kom herroep in die opstanding van Jesus Christus uit die dood. Onthou, Jesus het nie gesterf as die tweede Adam nie. Hy was inderdaad die laaste Adam. Die Adamiese geslag sterf toe Jesus sterf. Toe Jesus lewend gemaak word, toe word ’n nuwe skepping gebore en as ons ingesluit is in Sy dood, is ons ewe ingesluit in Sy opstanding. Ons het gesukkel om dit te glo, want vir jare was ons verwysing ons eie ervaring en ons eie doktrines en leerstellings wat hierdie ervarings moes gestand hou. Dan het ons hier ’n Skrif en daar ’n vers beet en nou regverdig ek my woestynlewe, tot ons die kruis ontdek en ons sien wat werklik met ons gebeur het toe Jesus opgestaan het uit die dood. Wat het waarlik met die vyand gebeur. Die vyand wil so graag my ongeloof gebruik om my sinne weer te verduister.

Gebed.

Vader, ek kan U vanoggend dank dat ons die voorreg het om ’n verwysing te ontdek in God se uitspraak in ons lewe, wat meer geldig is as die mooiste foto op ons ID boek. Here, U het kom definisie gee aan die mens. U het ons kom onderskei. Ek dank U dat U iets wakker maak in ons harte vanoggend. Die waarheid, die integriteit van ons oorspronklike waarde, onskuld en identiteit. Dat ons sal kan besef dat hierdie beeld nie sommer net “wishfull thinking” is nie. Dit is nie maar net ’n positiewe boodskap vir ’n Sondagoggend om oor na te dink nie, maar Here dat ons hierdie waarheid so sal bepeins en so sal aangryp dat ons sal agterkom hoe ons van binne af vernuwe is in die gees van ons gemoed. Dat ons sal agterkom dat ons anders dink en ons dink vanuit ’n nuwe vertrekpunt. Ons het ’n nuwe verwysing en dit is ’n ewige rotsvaste verwysing. Ons hoef nooit weer te steier onder die leuens van die verlede nie. U het Egipte uitgekanselleer uit Israel se toekoms. Sò het U die vyand kom uitkanselleer uit ons lewe deur die een heldedaad van Jesus aan die kruis. Een het vir almal gesterwe en daarom moet julle julleself ook doodreken vir die sonde. Ons wil hierdie som kom maak vanoggend om saam met U te stem oor ons lewe en dan wil ons nooit weer toelaat dat ’n sluier van enige definisie vir ons sal hinder om helder te sien nie. In 2 Petrus 1 sê U dat U Goddelike krag ons alles geskenk het wat tot die lewe en die godsvrug dien, maar hy by wie hierdie dinge afwesig is, het blind en kortsigtig geraak. Here, ons wil nie kortsigtig dink nie en ons wil nie toelaat dat ons huidige omstandighede ons gesprek word nie, maar dat ons aanhoudend sal praat vanuit dieselfde bron en verwysing en die oortuiging van God se geloof. Here, ons aanbid U daarvoor. Dankie Here vir die geleentheid wat ons het om vir mense in hierdie week wakker te maak tot die besef van hulle ware onskuld en hulle ware identiteit. Ons ken geen mens meer volgens die vlees nie. Here, ons dank U vir hierdie waarheid. In Jesus Naam. Amen.