God is met ons!

Vanoggend ry ek in die kar en die ou bekende liedjie speel oor die radio: 

What if God was one of us…….??

If God had a name, what would it be?
And would you call it to his face
If you were faced with Him in all His glory?
What would you ask if you had just one question?

And yeah, God is great
Yeah, God is good
What if God was one of us?
Just a slob like one of us?
Just a stranger on the bus
Trying to make His way home?

If God had a face, what would it look like?
And would you want to see
If seeing meant that you would have to believe
In things like Heaven and in Jesus and the saints
And all the prophets?

Ek ry en dink wat mense van Jesus sou dink as Hy vandag tussen ons gewandel het. Ons het Hom deur die jare al so verander, Hom so iets anders gemaak as wat Hy is. Ek dink nie ons sou Hom nie herken het nie, sou Hom dalk nie eers gevolg het nie. Hy sou al die verkeerde labels van hierdie wereld gedra het….Hy sou nie ingpas het nie, sou nie die “cut” gemaak het nie.

Hy sou dieselfde slegte reputasie van Sy tyd gehad het, wyn suiper en vriend van die sondaars. Sy eerste wonderwerk was om 680 liter wyn te maak vir ‘n troue waar die mense alreeds die heel aand wyn gedrink het, net om een storie te noem.

Hy het rondgeloop met ‘n baard, lang hare en geen werk, in ons woorde ‘n werklose, huislose boemelaar op die straat wat moes rigting kry.

Jy sien, hy was nooit ingestel op labels en wat mense gedink het van Hom nie. Hy sou vandag seker dieselfde gewees het as toe – Die Messias wat gekom het sonder ‘n groot “whoo haa”, wat mense gesoek het wat gebroke en seer was, alleen, siek en moeg vir die stelstels van die dag. Hy sou nogsteeds net met sy besigheid aangegaan het en dit was om die goeie nuus te bring, stories te vertel, mense van hulself te red, die blindes werklik te laat sien, om die gebrokenes van hart op te tel, en ‘n gunstige jaar uit te roep oor elkeen wat in kontak met Hom gekom het.

Ek glo nie Hy wou ooit in ‘n teologiese boksie geplaas word nie, maar ek glo Hy wil persoonlik ervaar word. Hy ken die “rock bottom” van ons elke dag. Hy is nie die preetse regter, harde hart, swart en wit God, wat mense vir ons voorgehou het nie.

Miskien is Hy net wie Hy is, en moet ons Hom so leer ken. Hy is nie lus vir doktrines en strikvrae nie. Hy is geintereseerd in JOU..

God was en sou vandag tussen ons net “real” gewees het. Geen verdraaiing van Homself nie. Geen korrekte verteenwoordiging van Homself nie. Net Homself soos Hy is... Net daar waar jy is, op die vloer, op die bed, in die kar, terwyl jy nagte wakker le , terwyl jy draf...Net waar jy is, hoe jy is...

Hy het gepraat met skares as dit was wat Hy wou doen. Hy het weggeraak alleen as alles te veel gevoel het. Hy was geirriteerd met die smouse in die tempel en het eintlik heeltemal Sy humeur verloor en hulle uitgesmyt. Nooit het Hy verby 'n sieke geloop sonder om te genees nie.
Sy tere oomblik in Getsemane wys Sy af tyd, Sy tyd van inmekaar stort, Sy "rock bottom". Waar Hy bloed gesweet het en op sy kniee voor God gesmeek het dat die beker verby sal gaan.

Dalk sou Hy vandag met hedendaagse medici, gediagnoseer geword het met een of ander geestelike versteuring, bipolar, of skisofrenie….Hulle sou Hom tien teen op medikasie wou plaas oor die stemme in Sy kop…

Ek dink my punt in alles is dat Hy mens wees ken en verstaan. Hy was een van ons, is een van ons. Hy ken lewe, hy ken die struggles en die battles. Hy is bewus van ons onsekerhede, ons agterstande en tekortkominge. Hy weet wat dit is om jou kop te wil stil maak as die reus se stem jou bly uittart.

Hy ken vrees en angs, Hy ken mislukking, Hy ken teleurstelling, Hy ken frustrasie, Hy ken stukkend, seer, platgeslaan, blydskap, vreugde, ekstase………Hy ken JOU.

Maar, Hy ken ook Sy Vader, en het die wete, die oortuiging dat ons in hierdie wereld is, maar nie van hierdie wereld is nie. Dat ons goeie moed kan hou, want Hy het die wereld reeds oorwin. Hy weet dat soos Hy en Sy Vader een is, is ons een met Hom.

Hou dus goeie moed, God is met ons!!

Wie is God vir jou?

Elkeen van ons leer Hom ken. Elkeen stap Sy eie pad, maak sy eie besluite en dra sy eie gevolge.

Baie van ons ken Hom soos Hy vir ons voorgehou is deur iemand anders, ons ouers, jou pastoor of dominee, of ‘n goeie vriend.

Baie van ons het ‘n diep intense begeerte om Hom te leer ken, om werklik te weet wie hierdie God en Vader regtig is. Ek glo dis deur jou eie intieme ervaring van en met Hom wat jy Hom werklik leer ken. In jou seer waar jy Sy krag sien werk, in jou hopeloosheid waar sy Hoop die rots is. Ek kan net getuig en deel vanuit my eie ervaring, Sy track record in my lewe en huidige situasie is 100%!! Hy het Homself al oor en oor bewys. Maar tog elke keer, en in elke omstandigheid, sien ek meer van Sy karakter, ervaar ek meer van Sy hart. Sy intense liefde vir my, Sy droom oor my, Sy seer saam my, en Sy vreugde saam my.

Job deel hierdie waardevolle ervaring:

 Job 42:5  Volgens hoorsê het ek van U gehoor; maar nou het my oog U gesien.

Job 42:6  Daarom herroep ek en het berou in stof en as.

Nou het Job self gesien en nie meer van hoorse gehoor nie. Nou kan hy uit sy eie ervaring deel en getuig,

Rom 10:6  Maar die geregtigheid wat uit die geloof is, sê dit: Moenie in jou hart sê nie: Wie sal in die hemel opvaar, naamlik om Christus af te bring;

Rom 10:7  of: Wie sal in die afgrond neerdaal, naamlik om Christus uit die dode op te bring?

Rom 10:8  Maar wat sê dit? Naby jou is die woord, in jou mond en in jou hart. Dit is die woord van die geloof wat ons verkondig:

Niemand kan God se hart en Wie Hy is vir jou “bring” nie. Jy self gaan Hom leer ken. Naby jou is Hy..

Dis sy hart vir jou en my, intimiteit. ‘n Lewe in oorvloed, goedheid en guns wat ons volg al die dae van ons lewe. ‘n Hoopvolle toekoms, ‘n lewe van oorwinning, vrede, vreugde. Sy hart is dat jy kind is, nie slaaf nie. In slegte en goeie tye, bly Hy God, en bly Hy ‘n goeie Vader. Ek daag jou uit om Hom elke dag meer en meer intiem te leer ken.

Uit my ervaring van die laaste ruk, kan ek die volgende kom deel. Ek het een aand gedroom en in die droom was daar ‘n duidelike padaanwysing met die word Elysian daarop. Toe ek die volgdende oggend wakker word het ek die woord gaan google omdat ek geen idee gehad het wat dit beteken het nie, en nog nooit voorheen die woord gehoor het nie.

Dit beteken die volgende:

“perfect, peacefull, divinely inspired, delightfull, beautiful, blissful, creative, in grieks het dit verwys na “characters of heaven”, “a state of happiness which most people hope to enjoy”

Hierdie was Sy hart vir my in ‘n tyd wat dinge bietjie deurmekaar was, en toe ek daardie dag gaan lees kry ek die versie in Jes 62:2…; “en jy sal met ‘ n nuwe naam genoem word, wat die mond van die Here sal noem.” God het my “naam kom verander”. Hy wil intiem betrokke wees in jou elke situasie as ons Hom net sal toelaat en raaksien dat Hy intens belang stel in ons.

In Ps 45:1 staan die volgende - My hart word bewoë deur goeie woorde; ek dra my gedigte voor aangaande ‘n Koning; my tong is die pen van ‘n vaardige skrywer.

God het Sy hart die afgelope ruk kom deel met my en dan skryf ek sommer neer wat ek ervaar. Ek het gevoel om die volgende gedig te deel omdat ek voel dat dit Sy hart so duidelik vir elkeen van ons, in watter situasie ook al kom openbaar:

Broos

My Ego, my emosies

Breekbaar

My hart

Ontbloot, weerbaar

My wese

Doolhof

My denke

Maar in hierdie plek is Hy naby

Hier hoor jy elke asemteug

Jy voel elke klop van sy hart

Jy weet

Jy hardloop en word nie moeg

Ek kyk toe

In hierdie brose ontbloting ervaar jy lewe

Proe jy krag wat deur jou borrel

Vlieg jy hoog

Hier onthou jy wie jy was

Wees jy weer wie jy kan wees

Hier lewe jy, al le die seer nog vlak

Hier is jy heel al wil jou oog nie sien….

Laat jou evaring van wie God is vir jou openbaar word in elke situasie en omstandigheid. Sien Hom in die goed en sleg. Ervaar Hom in jou seer en jou vreugde. Voel Hom, proe Hom, sien Hom, hoor Hom.

Weet dis Hy, God met jou…

LEWE!!

Ek is die laaste ruk gekonfronteer met my indentiteit in Chrisuts. Die leuen wil vir jou kom voorhou dat jy nie goed genoeg is nie, dat jy meer moet doen om God te behaag, om ‘n beter ma te wees, beter vrou te wees, alles net beter en beter.  Ek onthou dat vyand in die vorm van ‘n slang, ook vir Eva hiermee kom konfronteer het, toe hy vir haar baie subtiel met die leuen kom verlei het:

Gen 3:4  Toe sê die slang vir die vrou: Julle sal gewis nie sterwe nie;

Gen 3:5  maar God weet dat as julle daarvan eet, julle oë sal oopgaan, sodat julle soos God sal wees deur goed en kwaad te ken.

Maar jy sien, ons weet al te goed dat God die mens in die vorige hoofstuk, na Sy beeld en gelykenis gemaak het. Hulle was, en is soos Hy. Hier kom Eva met haar beste bedoelings en eet van die vrug om soos Hy te wees.

Die vyand kom nie met leuens wat ons teologie en geloof “obviously” kom teestaan nie…Nee hy kom subtiel, hy gebruik jou eie “insecurities” en sogenaamde tekortkominge om jou te mislei oor wie jy in Christus is.

Ek lees ook Genesis van 2 bome, die boom van die lewe, en die boom van kennis van goed en kwaad. Dis ons keuse waar ons wil lewe, onder watter boom ons wil piekniek hou. Aan die een kant is daar die boom van die LEWE, God se droom vir ons, God se hart vir die mens. Sy liefde en RUS. ‘n Plek waarnatoe hy ons neem en neerle langs groen weivelde en vir ons ‘n tafel berei voor ons teenstanders.

Dan is daar die boom waar onder ons, ons heeltemal te veel bevind. Die boom van kennis van goed en kwaad. Hier is die hard werk, performance, doen!! Hier is tot ons beste werk goed, maar in die verkeerde boom. Ek glo dat al hoe jy onder hierdie boom operate, is deur jou prestasie te meet. Dis mos hoe jy sien wat is goed en kwaad. Hoe goed het jy vandag gedoen met jou humeur op die paaie? Wat was jou vlakke van geduld met jou kinders? Het jy by jou dieet en oefenplan gehou? Hoe goed of sleg, goed of sleg…… En wat wys die uitslae daagliks? JY KON BETER. Jy is nooit hier goed genoeg nie, jy skiet altyd tekort.

Maar hou moed, daar is goeie nuus.

Deu 30:19  Ek neem vandag die hemel en die aarde as getuies teen julle; die lewe en die dood, die seën en die vloek het ek jou voorgehou. Kies dan die lewe, dat jy kan lewe, jy en jou nageslag..

Dis ons keuse vandag waar ons wil lewe. Ek kies om te lewe onder die boom van die lewe. Daar waar die volheid van Hom in my woon liggaamlik, in die skeur op die rots soos Moses. Daar waar daar geen veroordeling is nie, waar vrede wat alle verstand te bowe gaan my omring. Waar heerlikheid my vooruitgaan en Sy geregtigheid my agterhoede is. Daar waar ek geplant is langs strome van lewende water, waar ek vrug dra op die regte tyd, en wees soos ‘n boom waarvan diie blare nooit verwelk nie.

Dan sal ons wees ‘n aangename geur, sout vir die aarde en lig vir die wereld.

Wees geseend!!

Jy verdrink nie, jy loop op water!!

Vier jaar gelede het ek laas my hart hier gedeel. Hoe dinge nie darem in 4 jaar kan verander nie. Hoe jou "storie" nie darem net na absoluut iets toe verander wat jy nooit sou geskryf het oor jou self nie. Ek praat nie nou van hoe ons drome vir ons lewens verskil met God se droom nie, ek praat van hoe die lewe en omstandighede kom en alles in jou prentjie kom verander.

MAAR hoe God jou nooit ooit verlaat nie, jou nooit begewe nie, jou nooit alleen laat nie.
Hoe Sy karakter nie verander nie. Hoe Sy hart en droom oor jou nie verander nie. Jy is Sy liefdesgedig, Sy melodie, Sy hartsbegeerte na wie Hy verlang....

So rukkie terug was ek in situasie waar ek Jesus spreekwoordelik wou wakker ruk en die boot wou omgooi dat Hy saam met my in die water kom spartel vir lewe. Ek het besef Hy slaap soos in die gelykenis, omdat Hy weet alles sal OK wees. 
Maar diep binne het ek gewens Hy swem eerder hier langs my tussen die ongelooflike golwe en sluk saam my water. Ek het gewens Hy voel hoe ek moeg word om die regte keuses te bly maak om vreugde en vrede te kies.
Ek het kwaad begin raak dat Hy met soveel oortuiging my los om te fight vir my lewe en Hy le in die boot en slaap. 
Na ek hierdie beeld met n vriendin gedeel het wat saam my gebid het in hierdie tyd, het sy baie rustig vir my kom uitwys dat ek in die verkeerde storie is.......
Ek het verbaas gevra wat sy bedoel en sy het gese dat ek die verkeerde storie hier aanhaal. Yes, ek is in die water, en ja daar is 'n storm. Maar in hierdie storie is Jesus reeds in die water. Hy roep my na Hom toe. Ek is besig om op die water te loop, en nie om te verdrink nie. Hy le nie en slaap nie, Hy staan saam my. Al lyk die golwe hoe, en al sluk ek hoeveel water, ek loop saam met Hom op die water. Ek is nie 'n drenkeling nie, eks 'n wonderwerk. EK LOOP OP WATER!!

Ek sal oor tyd hier deel wat God oor die laaste 5 maande in my lewe kom doen het, nie die slegte ervaring of omstandighede nie. My fokus is nie meer daar nie, maar in die lewe van oorvloed wat ek het in Hom. Oorwinning en eintlik meer as oorwinnaar. Ek wil hierdie herontdekking van Sy goedheid kom deel omdat ek net glad nie sal kan stil bly nie. Ek sal nie kan ophou om Sy naam te besing en aan Hom die eer te gee vir wat Hy kom doen het nie. Hy is lewe en lig en sal vandag,more en tot in ewigheid dieslfede wees!!